| 劉以達與達嫂 達成一塊 |
二月廿七日，劉以達便五十歲了，可是，他的舉止行為仍然十年如一日，像個小朋友。
去年跟達明一派做訪問，由衣服配襯、拍照甫士位置、訪問和補妝等細節，他身邊總有明哥黃耀明，以及一眾唱片公司同事在旁指點協助；這一趟，除了經理人外，還有達嫂冼美珍全方位貼身照顧。
「老公，我（個妝）差唔多啦，不如你換衫先啦！」聽着達嫂如是說，達哥馬上拿起禮服到洗手間更換。
「老公，你係咪飲晒罐可樂啦？仲要唔要呀？」拍攝空檔，她看見他把整罐可樂倒轉，試圖把最後一滴往口裏送，不夠五秒，她已把一罐開了的可樂速遞到他的手中。
「BB，你係咪好眼瞓呀？不如伏低瞓陣先啦。」訪問時，她在跟我詳談之際，看見他開始陷入半夢半醒狀態，她即緊張地說。
如是者，整個訪問，不時也會聽到達嫂語氣嬌嗲地叫着「老公、BB、BB、老公」，而達哥則比與明哥在一起時說話更少，郁動得更少——的而且確，即使是工作拍檔廿多年，論親密和盡在不言中的程度，點計也始終不及同牀共枕十五年的另一半——這大概就是達明一派，和兩公婆達成一塊的分別。
九八年十二月二日，達哥和達嫂正式簽紙成為夫婦。那時達哥正處於事業上的其中一個低潮期。
在往註冊處的途中，達哥索性孭起達嫂。
兩公婆患難與共十五年，曾有好幾次陷入經濟拮据，基本飽肚也成問題。
追
達嫂說，早於八九年一個音樂雜誌搞的disco派對上，便與劉以達相識，那時她十八歲，他廿六歲。「我記得嗰日大概係七月三十號，我同佢打咗個招呼，佢就問我：『你係乜嘢宗教o架？』佢話想攞啲資料，就問我攞電話。」阿達在旁補充：「我當時想出本漫畫，同宗教有關，咪乜嘢人都問吓囉。不過嗰陣佢成個小妹妹咁，one -length頭，個樣又好鬼細個，都冇諗住溝佢。」
就這樣，他和她以「阿哥和阿妹」的關係約了好幾次外出。一年後，她負笈澳洲，一別便七年。「九七年，我有日睇電視見到佢玩緊《獎門人》，我就諗，不如寫封信去唱片公司畀佢呀，跟住我仲寄埋幅相畀佢。」
那封信寄出後兩個月，她便收到達哥的來電，約了在喜來登酒店相見，誰料他甫看見她，便想轉頭走。「嗰次見到佢，個樣真係好似tom boy呀！覺得佢寄畀我幅相有啲『坤』我囉！」在旁的達嫂即笑到聲說：「係呀！我嗰陣短頭髮電咗個『歷蘇』頭，又戴副粗框眼鏡，好男仔！係後尾有次佢見到我冇戴眼鏡個樣，就建議我拉番直把頭髮，唔好再戴眼鏡，仲話：『你拉番直把頭髮之後，我介紹啲靚仔畀你識呀！』哈哈哈！」
她把頭髮拉直、脫下眼鏡後的那夜，兩人到山頂餐廳晚飯，「呢個人竟然係咁夾嘢食畀我！走嗰陣，我去搭小巴返旺角，我上咗車之後，佢諗咗一陣就跳埋上車，話要送我返屋企。一個artist坐小巴喎！佢話冇所謂！」「我當時溝女呀嘛！」達哥說。
求
到了旺角後，他們貪玩找了個街頭占卜師問感情事。「我寫咗我個名嘅『珍』字畀嗰個女人，佢話：『你老公係六三年出世，屬兔，隻手做過手術！』我記得佢（達哥）係六三年出世，就問佢隻手有冇做過手術，佢原來真係有隻曾經劏過！我哋都O晒嘴！」然後他送了她回家。「我入咗屋之後，喺門罅見到佢企咗喺度一陣都唔走，我諗當時已經有啲愛火囉。」
一個星期六的下午，達哥打電話給她。「佢深呼吸咁同我講：『有啲嘢我想同你傾吓……我想追你呀！』我話：『放馬過嚟啦！』」
同日晚上，她如常為他預備了母親煲的湯水，達哥才拿上手，眼淚便直流。「嗰陣我感覺好孤單，冇乜寄託，又冇乜人關心我。」就是因為這碗湯愛上了？「其實個湯係加分o架咋，見到佢轉形象，都係『嘩！』o架咋，不過我諗我都係一路加緊佢分，加到咁上下，咪追囉！」他說。
在旁的達嫂即補充：「其實嗰陣我成日生眼瘡，但又唔夠錢睇醫生，有次同佢打邊爐，我問佢借錢，佢二話不說，就去咗附近一個櫃員機，撳咗個密碼之後，就叫我撳銀碼！我當時真係好感動！心諗，點解呢個男人可以對人好成咁呢？」
訂
才交往了幾個月，那年的boxing day，他們到了大澳遊玩，沒想到卻成為兩人的「求婚日」。達嫂說：「我哋喺銀礦灣一個酒吧飲嘢，我講笑咁話：『不如我哋結婚囉！』佢竟然好認真咁話：『好呀！就聽日呀！』吓？點知喺搭巴士去大澳時，佢喺度喊，佢話佢冇信心追到我，驚我會離開佢，嗰陣我有啲擔心佢，但又因為有個男人為自己喊，覺得好感動！然後佢仲叫我辭埋份工，佢話：『我真係想照顧你！』但我屋企比較保守，唔准我同居，最好有張紙囉，咁佢就提議同我媽咪見面。」
過了幾個月，她帶他見家人兼提親。「我屋企人見到係佢，都O晒嘴。然後我阿媽就同佢講：『你唔好介意我個女唔識煮飯、唔識執屋，佢都幾『呢啡』o架！』」
問達哥為何當時有結婚的念頭，他十分認真地說：「係個感覺嚟o架！好想用番社會上容許一男一女一齊合法咁去愛！我之前嗰啲（女友）都冇呢個諗法，都只係住埋，但我就好想畀番佢一個名份囉！」
信了耶穌後的達哥，去年推出個人品牌的福音唱片《希望之旅》。
和明哥拍檔廿多年，達哥說，他去年宣布出櫃，很勇敢！
拍《大內密探零零發》扮女人，令達哥曾經在電影方面頗有市場。
結
九八年十二月二日，兩人在婚姻註冊處正式簽紙成為了合法夫妻，她亦成為了全職達嫂，全心全意去照顧達哥的一切，包括財政。「試過有段日子，我哋真係好拮据！我嗰陣唔擔心自己，係擔心佢，只係諗：『我唔可以畀老公知道有幾多銀碼！』好多時，當我真係一毫子都冇，我反而會保持冷靜，笑住咁返屋企。
「我試過一日買七個雞尾包頂住，又試過同佢笑騎騎咁講：『今日不如食公仔麵呀，出前一丁都好好食o架！』我諗……（鼻頭開始紅起來）我一定要保護佢，我嘅責任，係要令呢個男人開心，無憂無慮，同埋要做到畀大家睇：我哋嘅經濟係冇事嘅！」說罷，只見她眼角有點淚水。
接着，達哥輕輕地說：「其實我當時都大概估到有幾多收入，因為冇戲拍，又冇人搵我做音樂。不過最大單係幾年前簽咗畀人，結果冇晒啲錢囉！」○六年，他因與經理人反目，拿出來打算出碟的九成積蓄化為烏有，「嗰次我爭啲跳樓！」
「唔係爭啲呀！」達嫂在旁插嘴：「佢直情半個身已經喺天井個石壆外面，好彩我夠大力先扯番佢返入嚟咋！嗰晚仲要係我生日，兩個鐘頭後我仲有幾個朋友買埋蛋糕嚟同我慶祝，仲要吹蠟燭，扮冇事發生過多謝人！其實我當時個心好怯o架！跟住冇耐接到套《流浪世界盃》（福音電影），我哋先開始有番啲收入，仲信埋耶穌……（企圖跳樓）呢件事，大家都有成長！有時佢一depress，我就會喺佢隔籬打氣：『老公！好快我哋會有好多錢返o架啦！我哋會住大屋，養靚狗o架！』
「總之，佢就係小露寶，我就係小賓女，小賓女係小露寶嘅天使，所以，我會成日幫佢打氣！」
此時，我看見本來在「釣魚」的達哥，忽然微微張開眼睛在偷笑。
五十而知天命
二月廿七日，劉以達便五十歲了，那天晚上，他會在藝穗會舉行派對，既慶祝生日，又慶祝結婚十五年，更順道發布新唱片。
去年達明演唱會慶功上，達哥曾告訴我，這個派對，多少是為明哥而設，以彌補當年結婚沒有請他。「呢個show張帖（邀請卡），我第一個就畀佢啦！」達哥說。
那年他結婚，報章雜誌都語帶嘲弄說他在深井食燒鵝「擺酒」。「其實嗰晚只係我同佢兩家人食飯，咁簽完紙咯，跟住呢，唔知邊個諗咗話去深井食飯，咁就去食囉！其中一味餸真係有燒鵝o架！本來我哋都諗住會再搞party，有一半心態係諗住搵銀！因為當時有啲圈中人同我講，擺酒都係一個搵錢嘅途徑嘛！咁跟住呢，簽完紙冇耐，我就要返大陸拍戲，就拖拖拖拖拖到依家先開囉！」
達嫂即補充：「呢個show要牽涉好多人力物力，我都好頭痛，我祈過禱，結果到依家我哋一毫子都冇用過！」
最後，我問他們，為何結婚多年都沒有計劃生育，達哥說：「physical方面，我哋唔識湊；精神方面，我哋更加湊唔到！因為我哋自己都係細路仔，要個BB喺依家呢個咁嘅世界度長大，我哋負唔到呢個責任囉！」
達哥，實情是個心水很清的人。
達哥二月廿七日生日當晚，將於藝穗會舉行派對。
