劉以達與太太冼美珍跟基層市民一樣買唔起樓，被迫捱貴租。踏入半百仲要等運到，達哥一度心灰意冷

樓價貴到飛起，劉以達與太太冼美珍跟基層市民一樣買唔起樓，被迫捱貴租。踏入半百仲要等運到，達哥一度心灰意冷，幸而4年多前搬入林村3樓連天台的700呎村屋住，面向許願樹日日吸收靈氣，夫婦愈來愈正面，工作也顯得積極。日前達哥在50歲生日會上許願，承諾努力儲蓄買樓送畀老婆，但未實現前，先送模型屋！兩個「大細路」共同嗜好是儲模型，劉家一室模型，蝙蝠俠，小丑及超人置身其中，能拾回童真。

全屋至愛——「放喺我工作房門後，高6呎嘅Batman，身披嘅戰衣以萬5蚊美金從ebay bid番嚟，我最鍾意89年呢個造型，貪佢望落去惡啲。為咗套衫，兩公婆用幾百蚊，夾手夾腳喺深水埗托個Display假人返嚟，好彩size幾合身，着上身啱啱好。我哋會幫佢換衫，要換季嘛！」
漫畫王國——達哥的Batman玩具集中擺在工作室，房間左面擺滿Batman figure及Batman車，望住深愛Figure，創作起來都特別有mood。「蝙蝠車係2年前花4000蚊買，家陣升值到近萬，係最貴嘅一件玩具。」
Figure集中營——超級Batman迷達哥亦擁有自己的「漫畫王國」，Figure大部份是1比6，荷里活影星、變形金剛、蝙蝠俠等逾百個，Batman figure動輒數百元至數千元，雖然貴，但都算係唯一嗜好。他興奮道：「部份係限量版，所以有炒價，有啲經已炒到double價。」
歐洲公仔——另一邊的工作枱後，也放滿達嫂喜愛的歐洲公仔，包括來自德國《胡桃夾子》公仔、印尼布馬、俄羅斯音樂盒、娃娃、聖彼德大教堂雕塑，因為她愛去旅行，故有多個地球儀。
結婚花園——模型屋旁邊是15周年結婚花園，除了有新娘新郎音樂公仔外，還請來小狗、雞、兔、瑞典馬、天鵝等齊齊過來，在草坡地上開「派對」。
旋轉木馬——童話世界中旋轉木馬不可缺少，她說：「呢個以3000蚊喺大埔一間格仔舖度搜羅返嚟，Made In USA㗎，當地都要買到成2700港元，有50首音樂㗎。」
動物屋——因為達嫂是狗癡，不同形態的小狗模型，處處可見。甫入屋就見到一大座高兩層的模型玩具屋，全部來自夜冷店及跳蚤市場，所以好抵玩，全部都是五蚊、十蚊：「模型屋內擺設好精緻，有家具、屏風、甚至會發光的吊燈，都係我逐件買返嚟砌入屋嘅珍藏。間玩具屋最貴，之前賣成1700蚊，我唔捨得買，最後見舖頭減至400蚊就即刻買。」達嫂說